Greece aur Israel ke beech hua 3.5 billion dollar ka sabse bada defense agreement, Achilles Shield karega suraksha.
Greece aur Israel ne aakhirkaar ek bade defense agreement par hastakshar kar diye hain jise 'Achilles Shield' naam diya gaya hai. Yeh samjhauta dono desho ke itihaas me ab tak ka sabse bada defense export deal mana ja raha hai jiski kul laagat $3.5 billion hai. Is contract ko tel aviv me Monday, August 31, 2026 ko aadhikarit taur par poora kiya gaya jiske liye pichle teen sao se baat-cheet chal rahi thi. Iske tahat greece ki suraksha ke liye ek naya aur majboot multi-layered air defense system taiyar kiya ja raha hai jisse desh ki aakashiye suraksha behad chauband ho jayegi.
Kaun-kaun se adhikari the shaamil aur kya hai is deal ka maqsad
Is mahatvapurna samjhagte par israeli defense ministry ke director general Amir Baram aur unke greek samkaksh general directorate for defense investments and armaments ke head Ioannis Bouras ne sign kiya. Is deal ke antargat israel greece ko ek poora defense array pradan karega jo ki ballistic missiles, cruise missiles, vimano aur unmanned aerial systems yaani ki drones jaise khatro ko aasani se rok sakega. is poori architecture me Rafael Advanced Defense Systems ke David's Sling aur BARAK MX systems ke sath-sath SPYDER air defense system aur IAI ki sahayak company ELTA Systems dwara viksit MMR multi-mission radars ko joda jayega. Iske alawa, rafael ka ek naya national command-and-control system in sabhi purzo ko ek hi jagah jodkar kaam karega taaki kisi bhi khatre par turant najar rakhi ja sake.
Strategic sthalo ki suraksha ke liye aatirikt contract
Is mukhya samjhote ke alaava ek $30 million ka aatirikt contract bhi sign kiya gaya hai jiske tehat Rafael ke Drone Dome systems kharide jayenge. Iska mukhya maqsad desh ke mahatvapurna aur strategic sthalo ko bina pilot ke udne wale drone khatro se bachana hai. Israeli defense minister Israel Katz ne bataya ki yeh sajhedari aapas ke strategic hiton ko samne rakhti hai. Wahin greek defense minister Nikos Dendias ne kaha ki yeh deal aane wale samay ke regional khatro se nibatne aur apni sena ko aadhunik banane ke liye behad zaroori thi. Iske sath hi greece aesa pehla european union desh ban gaya hai jisne is tarah ka poora israeli design kiya hua system apnaya hai.
Industry me sahayog aur aane wala samay
Yeh poora project lagbhag 35 mahine me poora kiya jayega aur isme aoudyogik sahayog ke liye bhi bade prabandh kiye gaye hain. Greek defense kampaniya isme subcontractor ke roop me hissa lengi jinka kul yogdaan $700 million se $750 million ke beech hoga. is samjhote me technology aur anubhav ka aadaan-pradaan bhi shaamil hai jisse greece me hi ek production base banaya ja sakega aur aage chalkar iska niryat kiya ja sakega. Yeh pehal greece ke us bade military modernization program ka hissa hai jiske tehat saal 2036 tak kul $28 billion kharch kiye jaane ki yojana hai. Amir Baram ne is deal ko israel ki us ranniti ka ek bada hissa bataya jisse defense export ko badhava milta hai aur videshi niti par pakad majboot hoti hai.